Mina ndzi ntombhi ya le Mariveni,
Muganga lowu nga ehandle ka doroba ra Tzaneen,
Exifundzheni xa xa Limpopo,
Ndhawu yo rhula no fuwa hi mihandzu yo hambanahambana.
Emugangeni lowu, ha tivana no khomana swinene, loko hi vulavula hi Vumunhu, na loko u la ku vona ku hakunene switeka muganga ku kurisa n’wana, tana eMariveni.
“Kaya ra swilo” n’wina!
I vito leri hi vitanaku muganga wa hina ha rona,
Hikuva eka wona u kuma madokodela, magqweta, vadyondzisi, vutshila na ndzhavuko, vuswikoti I ntsandza vahlayi,
I muganga lowu naveriwaka hi mani na mani.
I ndzhawu leyi nga rhendzeriwa hi milambu, leyi hi tiselaku mati emalayenini ya ka hina,
Vo tala swa hi olovela ku tirhisa milambu leyi tani hi ndhawu yo hungasela eka yona hi karhi hi phasa tihlampfi, no hlambela kona.
Hakunene hi le kaya ra swilo.
Eka muganga wa ka hina wa mariveni, hi na tindhuna timbirhi leti hi rhangelaka, ku nga ndhuna Hosana na ndhuna Mavele, lava nga le hansi ka vurhangeri bya hosi Muhlava.
Mariveni, a yo vitaniwa kaya ra swilo ntsena,
Kambe yi vitaniwa kaya ra swilo hikokwalaho ka mintirho yo saseka, ni vanhu lava tshamaka eka yona, lavo hlawuleka.
I muganga lowu hi kotaka ku ti hanyisa hi vuswikoti byerhu,
Halalaaa, Mariveni halalela,
Hakunene ku kaya ra swilo wena,
Ndza ti nyungubyisa hi wena hi masiku.
About The Author
